Аб ролі Канстытуцыйнага Суда ў забеспячэнні канстытуцыйнай законнасці расказала суддзя Канстытуцыйнага Суда Рэспублікі Беларусь А.М.Бодак супрацоўнікам і слухачам Цэнтра па рабоце з насельніцтвам і выбарчаму працэсу Акадэміі кіравання пры Прэзідэнце Рэспублікі Беларусь.

У ходзе лекцыі былі падрабязна разгледжаны этапы канстытуцыйнага будаўніцтва ў краіне, роля Канстытуцыйнага Суда ва ўмацаванні беларускай дзяржаўнасці і яго кампетэнцыя. Асобна былі прадстаўлены тэарэтычныя і практычныя аспекты функцыянавання інстытута канстытуцыйнай скаргі як асаблівага механізма абароны правоў і свабод грамадзян. Лектарам таксама была адзначана неабходнасць удасканалення прававой культуры і фарміравання канстытуцыйнай правасвядомасці.

«Тэма забеспячэння канстытуцыйнай законнасці і ролі Канстытуцыйнага Суда ў гэтым працэсе сёння набывае асаблівую актуальнасць. Для спецыялістаў і дзяржслужачых, якія задзейнічаны ў выбарчым працэсе, важна глыбока разумець фундаментальныя прынцыпы Асноўнага Закона. Няўхільнае выкананне канстытуцыйных норм і прынцыпаў, высокая прававая культура выступаюць неабходнай умовай дэмакратычнага развіцця грамадства», – падкрэсліла суддзя ў сваім выступе, акцэнтаваўшы таксама ўвагу на важнасці і неабходнасці фармавання высокага ўзроўню прававой культуры і канстытуцыйнай правасвядомасці ў грамадзян, асабліва ў моладзі.

У рамках сустрэчы слухачы Акадэміі кіравання змаглі задаць пытанні аб спецыфіцы канстытуцыйнага судаводства і сучасных тэндэнцыях канстытуцыйнага развіцця.

Падобны фармат узаемадзеяння Канстытуцыйнага Суда Рэспублікі Беларусь з дзяржаўнымі служачымі дае магчымасць апошнім пашыраць прафесійныя веды аб прававой сістэме беларускай дзяржавы.

У завяршэнне мерапрыемства для яго запрошаных удзельнікаў была арганізавана азнаямленчая экскурсія па будынку Канстытуцыйнага Суда.