Ключавыя вектары канстытуцыйнага развіцця краіны і механізмы абароны правоў грамадзян абмеркавалі ў Канстытуцыйным Судзе. Суддзя Ала Мікалаеўна Бадак сустрэлася са слухачамі і супрацоўнікамі Цэнтра па рабоце з насельніцтвам і выбарчым працэсе Акадэміі кіравання пры Прэзідэнце Рэспублікі Беларусь.

У цэнтры ўвагі знаходзіліся этапы фармавання айчыннай мадэлі канстытуцыйнага будаўніцтва. Суддзя падрабязна раскрыла паўнамоцтвы Канстытуцыйнага Суда і яго ўклад ва ўмацаванне асноў беларускай дзяржаўнасці.

Асаблівую цікавасць аўдыторыі падчас лекцыі выклікалі пытанні функцыянавання інстытута індывідуальнай канстытуцыйнай скаргі. Было падкрэслена, што гэты інструмент сёння з'яўляецца адным з дзейсных механізмаў прамой абароны канстытуцыйных правоў і свабод кожнага чалавека.

Выступаючы перад прадстаўнікамі Акадэміі кіравання, суддзя акцэнтавала ўвагу на непарыўнай сувязі паміж выкананнем норм і прынцыпаў Асноўнага Закона і ўстойлівым развіццём грамадства.

«Пытанні забеспячэння канстытуцыйнай законнасці сёння набываюць стратэгічнае значэнне. Для спецыялістаў, якія працуюць з людзьмі і задзейнічаны ў выбарчым працэсе, крытычна важна не проста ведаць тэкст Канстытуцыі, але і глыбока разумець яе фундаментальныя прынцыпы. Высокая прававая культура і сталая канстытуцыйная правасвядомасць - асабліва ў моладзі – гэта абавязковая ўмова далейшай дэмакратызацыі нашай дзяржавы», – падкрэсліла А.М.Бодак.

Фармат сустрэчы дазволіў яе удзельнікам – дзеючым і будучым дзяржаўным служачым – задаць пытанні, якія датычацца спецыфікі сучаснага канстытуцыйнага судаводства і актуальных тэндэнцый у прававой сферы. Як было адзначана па выніках дыскусіі, такое прамое ўзаемадзеянне з суддзямі Канстытуцыйнага Суда дае магчымасць значна пашырыць прафесійныя кампетэнцыі дзяржслужачых і іх разуменне прававой сістэмы Беларусі.

Традыцыйным завяршэннем мерапрыемства стала азнаямленчая экскурсія па будынку Канстытуцыйнага Суда, падчас якой госці азнаёміліся з гісторыяй і традыцыямі беларускага органа канстытуцыйнага кантролю.