28 мая 2026 г. у Канстытуцыйным Судзе адбылася чарговая навукова-метадычная нарада суддзяў Канстытуцыйнага Суда і работнікаў Сакратарыята, прысвечаная актуальным пытанням канстытуцыйнага судаводства пры разглядзе канстытуцыйных скаргаў грамадзян.

Адкрываючы нараду, Старшыня Канстытуцыйнага Суда С.М.Сівец пазначыў асноўныя напрамкі ўдасканалення канстытуцыйнага судаводства, абумовіўшы іх неабходнасцю выпрацоўкі адзінага паняційнага апарату і ўніфікацыі патрабаванняў да зместу канстытуцыйнай скаргі, а таксама выпрацоўкі аднастайнай практыкі падрыхтоўкі актаў Канстытуцыйнага Суда.

Намеснік Старшыні Канстытуцыйнага Суда Н.А.Карповіч адзначыла, што аналіз і прадметнае абмеркаванне напрацаванай практыкі Канстытуцыйнага Суда дазволяць падрыхтаваць якасныя змены ў Закон Рэспублікі Беларусь «Аб канстытуцыйным судаводстве» і Рэгламент Канстытуцыйнага Суда Рэспублікі Беларусь.

Прадметам абмеркавання сталі вызначэнне паняцця «канкрэтная справа» для мэт канстытуцыйнага судаводства, аналіз форм і змястоўнае напаўненне вызначэнняў Канстытуцыйнага Суда па асобных падставах адмовы ва ўзбуджэнні вядзення справы па канстытуцыйных скаргах грамадзян, падрыхтоўка праектаў вызначэнняў Канстытуцыйнага Суда, апублікаванне актаў Канстытуцыйнага Суда ў афіцыйных крыніцах і іх распаўсюджванне ў сетцы Інтэрнэт з улікам патрабаванняў заканадаўства аб абароне персанальных дадзеных.

Па выніках абмеркавання дадзены адпаведныя даручэнні па распрацоўцы метадычных рэкамендацый, уніфікаваных узораў дакументаў, па падрыхтоўцы неабходных запытаў, якія тычацца апублікавання актаў Канстытуцыйнага Суда і абароны персанальных дадзеных, і адпаведных змяненняў у Закон Рэспублікі Беларусь «Аб канстытуцыйным судаводстве» і Рэгламент Канстытуцыйнага Суда Рэспублікі Беларусь.