Намеснік Старшыні Канстытуцыйнага Суда Н.А.Карповіч, суддзя Канстытуцыйнага Суда Т.М.Праташчык і работнікі Сакратарыята прыехалі ў дзіцячы дом з цёплай місіяй – падтрымаць выхаванцаў і выказаць удзячнасць маці-выхавальніку Юліі Канстанцінаўне Кальцовай-Макейчык.

Сёння ў гэтай вялікай і дружнай сям’і акружаны матчыным цяплом і клопатам сем выдатных дзяцей. Прадстаўнікі Канстытуцыйнага Суда азнаёміліся з умовамі пражывання, побыту і вольнага часу дзяцей і, адзначаючы бацькоўскую працу Юліі Канстанцінаўны як прыклад грамадзянскай адказнасці, цярпення і душэўнай шчодрасці, падкрэслілі, што абарона правоў дзяцей, стварэнне ўмоў для іх усебаковага развіцця, а таксама ўмацаванне традыцыйных сямейных каштоўнасцей з’яўляюцца найважнейшым прыярытэтам беларускай дзяржавы.

Візіт атрымаўся па-сапраўднаму святочным і практычным. Намеснік Старшыні Канстытуцыйнага Суда павіншавала выхаванцаў са святам і пачаткам летніх канікул. Прадстаўнікі Суда перадалі сям’і карысны падарунак і салодкія пачастункі для дзяцей.

Юлія Канстанцінаўна і яе выхаванцы шчыра падзякавалі калектыву Канстытуцыйнага Суда за падтрымку, увагу і падарункі. Завяршыўся візіт сумеснымі размовамі і памятным фатаграфаваннем.